താരം

ആയിരമായിരം നാഴികയ്ക്കപ്പുറം
മിന്നിത്തിളങ്ങുന്ന താരഗണങ്ങളേ
ഇത്രയും ദൂരത്ത് നിന്നു നീ ഞങ്ങളെ
നോക്കിച്ചിരിക്കുവതെന്തിനാണ്?

ദൂരത്ത് നില്‍ക്കുന്ന താരമേ നിന്‍ പ്രഭാ..
പൂരത്തില്‍ ഞങ്ങള്‍ മനം മയങ്ങീ
മിന്നിത്തിളങ്ങുന്ന നിന്നകം കാണുവാന്‍
എന്തുണ്ട് മാര്‍ഗ്ഗങ്ങള്‍ ചൊല്ലുക നീ

അങ്ങോട്ടുമിങ്ങോട്ടും മാറാതെ നീയെന്തേ
കാലങ്ങളായിത്തിളങ്ങി നില്‍പ്പൂ?
നിന്‍ നിറം കാണുവാന്‍ നിന്നെ ദര്‍ശിക്കുവാന്‍
ഒന്നു നീ താഴേക്കു വന്നിടാമോ?

ഞങ്ങളോടൊത്തു നീ വാഴുവാന്‍ വന്നാകില്‍
ചേലുള്ളൊരോടക്കുഴലു നല്‍കാം
മിന്നിത്തിളങ്ങുന്ന ചെഞ്ചുണ്ടില്‍ നല്ലൊരു
പാല്‍മണപ്പൂമുത്തമൊന്നു നല്‍കാം

ഓടിക്കളിച്ചു ചിരിച്ചു രസിച്ചിടാന്‍
വാടികള്‍ നിന്നെയും കാത്തുനില്‍പ്പൂ
ദൂരത്തു നിന്നു നീ ചാരത്തു വന്നാകില്‍
ഓമനപ്പൂമ്പട്ടു ചേല നല്‍കാം

ഇത്രയും കാലമായ് നിന്നെയും കാത്തിതാ
ഇക്ഷിതിയില്‍ ഞങ്ങള്‍ നോക്കി നില്‍പ്പൂ
മിന്നിത്തിളങ്ങും നിന്‍ പുഞ്ചിരി കാണുമ്പോള്‍

‍ഞങ്ങള്‍ തന്നുള്ളം കുളിര്‍ക്കുമല്ലോ.